Բացահայտիր Տավուշը. Աճարկուտ․ Տավուշի մարզի անտառային բնակավայրն ու նրա պատմական հուշարձանները

Աճարկուտը գյուղ է Հայաստանի Տավուշի մարզի Իջևանի տարածաշրջանում՝ մարզկենտրոն Իջևանից մոտ 16 կմ հյուսիս-արևմուտք, Քարահան գետի ափին։

Բնակավայրը գտնվում է Ծաղկավան գյուղից 4 կմ հեռավորության վրա։ Գյուղի նախկին անվանումներն են եղել Սևքարի անտառտնտեսությանը կից ավան և Սևքարի փայտամշակման գործարանին կից ավան։ Աճարկուտ է կոչվել 1967 թվականի մայիսի 25-ից։ Տեղի բնակչության հիմնական զբաղմունքը անտառտնտեսությունն է։ 

Աճարկուտի շրջակայքն աչքի է ընկնում պատմամշակութային հուշարձանների բացառիկ առատությամբ։ Այստեղ են գտնվում միջնադարյան հայտնի վանական համալիրները, որոնցից են Առաքելոց վանքը (XIII դար), Դեղձնուտի վանքը (X-XVII դարեր), Կիրանց վանքը (XIV դար) և Սամսոնի վանքը (XII-XIII դարեր)։

Գյուղի հարավային մասում պահպանվել են 1695 թվականին կառուցված Սուրբ Աստվածածին եկեղեցին և XIII-XIV դարերով թվագրվող պատմական գերեզմանոցը։ Տարածքում է գտնվում նաև հայտնի «Սրանոցի» կամուրջը։ 

Կոորդինատներ․ 41°02'09" N, 45°05'06" E (Աճարկուտ)