Բացահայտիր Տավուշը. Մխիթար Գոշի հուշարձանը. Իրավական մտքի հանճարը Գոշավանքի կամարների ներքո
Տավուշի մարզի գեղատեսիլ Գոշ գյուղում, միջնադարյան հայկական ճարտարապետության գոհարներից մեկի՝ Գոշավանքի վանական համալիրի տարածքում է գտնվում մեծանուն մտածող, հասարակական գործիչ, օրենսդիր և առակագիր Մխիթար Գոշի հուշարձանը։
Այս վայրն ընտրված է ամենայն պատշաճությամբ, քանի որ հենց Մխիթար Գոշն է 12-րդ դարում Իվանե Զաքարյան իշխանի աջակցությամբ հիմնադրել այս վանքը, որը ժամանակին եղել է հայկական մշակույթի, գիտության և կրթության կարևորագույն կենտրոններից մեկը։
Հուշարձանը ներդաշնակորեն լրացնում է պատմական միջավայրը՝ հիշեցնելով այցելուներին մեր իրավական մտքի հիմնադրի անգնահատելի ավանդի մասին։
Մխիթար Գոշի բրոնզաձույլ արձանի հանդիսավոր բացումը տեղի է ունեցել 2013 թվականի սեպտեմբերի 13-ին։ Հուշարձանի ստեղծման նախաձեռնողն ու հիմնական ֆինանսավորողը գործարար և բարերար Անտոն Մեհրաբյանն է։
Արձանը պատկերում է Մխիթար Գոշին նստած դիրքով՝ խոհուն և վեհաշուք, ինչը խորհրդանշում է նրա իմաստնությունն ու որպես օրենսդիրի հաստատակամությունը։
Կոորդինատներ` 40°43'47.1"N 44°59'48.7"E